جار القمر

دي مذكرات و كتبتها من ســنين/ في نوتة زرقا لون بحور الحنيـــن/ عترت فيها رميتها في المهمـــلات/ وقلت صحيح أما صحيح كلام مخبولين !!عجبي

الأحد، يناير ٢٩، ٢٠٠٦

اتأخرت كتير

سيداتي انساتي سادتي
على صوت و الحان خالد الذكر جورج بن وسوف .. نقدم لكم هذه النكته
..
بيقولك مره مدون بيتكلم مع اخته الطالبه في ثانويه ازهريه .. عندما جائت سيرة بنت خالتهم التي تأخرت ولادتها .. لتقول الاخت بكل بساطه ان الحمل قد يستمر اربع سنوات قمريه تامه سوداء
..
يتضح للمدون المذهول ان الاخت فعلا مابتهزرش .. و ان ما قالته هو مع سبق الاصرار و الترصد
..
يطلب دليلا فتحمل اليه كتابا دراسيا اخضر اللون .. عنوانه : الاقناع في حل الفاظ ابي شجاع
الكتاب مطبوع على نفقة قطاع المعاهد الازهريه و مقرر على الصف الاول الثانوي
كتب على غلافه
:
تاليف العلامه الشيخ شمس الدين محمد بن احمد الشربيني الخطيب الشافعي
وهو شرح على متن غاية في الاختصار في الفقه على مذهب الإمام الشافعي تأليف العلامه ابي شجاع احمد بن الحسين بن احمد الأصفهاني الشافعي
طبعة 2003 -2004
..
في الجزء الاول من الكتاب .. و تحت باب يضم احكام الحمل و الحيض و النفاس.. تقع الفقره المعجزه .. صغحة 150
:
اقل الحمل و اكثره و غالبه
وأقل زمن الحمل ستة اشهر , و لحظتان : لحظة الوطء و لحظة الوضع من امكان اجتماعهما بعد عقد النكاح و اكثره اي زمن الحمل : اربع سنين و غالبه تسعة أشهر للاستقراء كما اخبرنا بوقوعه الشافعي و كذا الإمام مالك حكى عنه أيضا انه قال : جارتنا امرأة صدق , و زوجها رجل صدق , حملت ثلالثة أبطن في اثنتي عشرة سنة تحمل كل بطن أربع سنين , وقد روى هذا عن غير المرأه المذكوره
..
اظهر استنكاري .. فتبدأ اتهامات الشك في كل ماهو ديني .. التزم موقع الدفاع و استعين بوظيفتي كطالب طب .. احاول شرح تسمم الحمل و استحالة سلامة الجنين او الام في اربع سنوات .. ترفض المسكينه تقبل ان تحمل كتبها الدينيه اي نقص
:
الطب بشري و ممكن يغلط .. بس الدين عمره ما يكون غلط
تصدمني الكلمه المتوقعه فاقرر غلق باب المناقشه
..
لكنها لا تكتفي و تؤكد موقفها اكثر باقتباس كلام معلمتها يوم قصت عليهن نبأ زميلة غرفة الولاده في مستشفى المبارك بالرياض .. التي حملت ثلاث سنوات و نصف .. ثم انجبت طفلا كاملا جميلا ارتهن صورته , اسمته احمد
..
سبحان الله

7 Comments:

At ١/٢٨/٢٠٠٦ ٩:٠٠ م, Blogger 4thH said...

حاجه كمان : الكتاب معظمه ملغي .. غير ان الجزء المعجزه مقرر و مطلوب و لازم يتجاب في كل امتحان بامر من الموجهين و المدرسين الاوائل في المحافظه

 
At ١/٢٨/٢٠٠٦ ١٠:٣٩ م, Blogger Alexandra said...

يكونش ده تابع بند ربنا أمر بالستر :))

 
At ١/٢٨/٢٠٠٦ ١٠:٤٣ م, Blogger bluerose said...

انا مش معترضة على كلمة "الدين عمره مايغلط" بس الكلام دا مافيش عليه نص ,بمعنى انه اجتهاد من بشر يؤخذ منه و يرد , و الآن بعد ان ثبت خطا هذا الافتراض فقد انتهت الحاجة لدراسته,ثم ان النص القرآني: "و حمله و فصاله ثلاثون شهرا" يتعارض مع فرضية استمرار الحمل 4 سنوات

ممكن يرد على اخته كدا
المشكلة ان الناس بتدي قداسة لحاجات غير مقدسة اصلا

 
At ١/٢٩/٢٠٠٦ ١٢:٢٤ ص, Anonymous غير معرف said...

أظن المشكلة أصلا مش في الناس بتقدس ايه، المشكلة في حشر الدين في حاجة مش محتاجة الدين خالص، معلومة بسيطة يمكن لأي انسان رصدها بنفسه، مش مستني نبي ولا رب ولا حتى عالم عشان نعرفها يبقى ملوش أي لازمة نبحث في القرآن عنها

 
At ١/٢٩/٢٠٠٦ ٤:٢٦ ص, Blogger Hany Mihanny said...

بص رغم اني كنت متوقع حاجة زي ديه فعلا تبقي نهاية النقاش طول ما انا بقرا لكن فعلالغايةدلوقتي مش مصدق
عارفة الكارثة ان ده لو مش دين فده كتاب الوزارة
صباح التنفس
صباح الروايح

 
At ١/٢٩/٢٠٠٦ ٥:١٣ ص, Blogger Hany Rizk said...

ممكنم اقول كلمة قبيحة وماحدش ياخد على كلامى

احييييييييييييييييييييييييه

 
At ١/٢٩/٢٠٠٦ ١٠:٠٨ ص, Blogger Guevara said...

يا سيدي خد من ده كتيييير .. ما سمعتش عن حكاية إنك لازم تمصمص الدبانة اللي لازم تقع في اللبن عشان الداء على جناح و الدواء على جناح آخر؟ الدبان منظم جدا ً زي ما انت شايف

طيب ما سمعتش عن البشر الكتير اللي بتصدق الكلام ده بدون أدنى قدر من التفكير لمجرد إنه حد أقنعهم إن الدين بيقول كدة؟

على رأي المثل: راجع تاني عشان تتسلى .. ولا بقالك فجأة ضمير؟

 

إرسال تعليق

<< Home