مناقشات في الجامعه

حلو قوي البلوج بتاعك على فكره-

شكرًا يا سيدي-

كان فيه قصيده حلوه بتاعتك دي؟؟-

قصيده؟ قصيدة ايه؟-

القصيده ... الشعر العامي اللي انت كاتبه-

انا ما كتبتش قصايد في البلوج-

يا بني.. اللي فيها صورة راجل قاعد على كرسي كده-

ااااااه مالها؟؟-

حلوه ... بس انت لسه محتاج شغل كتير و قرايه اكتر-

اممممممم شكرا يا سيدي بس دي مش بتاعتي-

يا راجل؟؟؟ انا برضه قلت ان ده مش اسلوبك-

انت عارف الاغنيه دي بتاعت ميين؟؟-

مييين؟-

مرسي جميل عزيز .. و غنتها ام كلثوم و اسمها فات المعاد-

.............................-

===================================

(on MSN messenger)

ايه يا زعيم الصوره اللي انت حاططها دي-

ماتعرفوش؟؟؟-

تقريبا مش غريب عليا-

خمن-

امممممممممممم رفيق الحريري الله يرحمه؟؟؟-

.................-

ايه ؟؟مين طيب؟؟-

ده .. ايمن نور-

اااااااااااه بتاع الكوره ......... افتكرت-

==================================

ايه يا بنتي مال شكلك خربان كده-

اصل امبارح سهرت شويه-

بتذاكري؟؟؟-

لا و الله .. كنت بتفرج على حلقات عمرو خالد ع الكمبيوتر-

اااه انا مش بحب الراجل ده-

مش بتحبه؟؟ انت مجنون-

ايوه يعني مش بقتنع بيه قوي.و مش بحب طريقته في الكلام-

انت بجد افكارك غريبه يا ((.....)) .. الظاهر صح اللي بيقولوه عليك-

بيقولو ايه ؟؟؟-

لا بلاش .. يا ريت بس ما نتكلمش مع بعض بعد كده غير في الدراسه و بس-

طيب -

==================================

يا رب بقى ... انا اتخنقت ... نفسي بجد تحصل حرب ,غزو, اي حاجه , اروح استشهد و ادخل الجنه حدف...لا مذاكره و لا منظره و لا

قرف.. تفتكر امريكا ممكن تحتل مصر قريب؟؟

==================================

!!!ياااااااه ده مالو تقديره نزل كده؟؟ مقبول؟؟؟-
طبعا ... اكيد ربنا مش راضي عنه اصله مش بيصلي-

==================================

(( في المدرسه))

يا مستر ازاي بس-

زي ما بقولك كده- ايام الرسول كانوا اكثر تقدما مننا.. يا ريت نرجع تاني نعيش في الخيام و نركب الجمال-

....................-

فيزيا ايه و خرا ايه بس... نفعتنا في ايه الفيزيا؟؟ اهي الامراض جايه علينا من كل ناحيه اشي ايدز واشي سرطان -

كله غضب من ربنا

...................-

انت بتجيب الكلام ده منين؟؟ لو سمعت منك الكلام ده.. او قلته لحد من زمايلك .. حافصلك-

==================================

يااااااااااااااه امتياز حته واحده... معقوله؟؟-

سبحان الله يا اخي-

ده مش بيصلي حتى-

اهو ربنا بيمتعهم شويه في الدنيا عشان يعذبهم بعدين في الاخره-

!!!!!!!!!

==================================

**

(عند اختي في الفصل-تعليم ازهري)

هو فعلا يا ابله مركز الارض مش سخن؟؟-

يا بنتي القصه دي خياليه ..وكلامها كله هجص -

طيب هو فين مركز الارض ده يا ابله-

يا بنات .. العلماء بره عمالين يصرفوا ملايين على ابحاث و اختراعات.. واحنا عندنا كل حاجه-

ازاي يا ميس؟؟؟-

-

مركز الارض يا بنات هو الكعبه ... و جول فيرن ده حمار ولا بيفهم حاجه.. مش عارفه ازاي المشيخه وافقت تدرسلكم الكلام ده.. ربنا يخلصنا منهم ومن قلة دينهم.

==================================

باركولي .. مش جبت الرخصه-

مبرووووووووك طب و العربيه؟-

مانا حاخد بتاعت الحاج بقى انت عارف-

اااه طب مبروك يا سيدي- عايزين نشوف سواقتك بقى-

ايوه انشاء الله بس اول ماتعلم السواقه حاخدكم كلكم فسحه ما حصلتش-

==================================

*

رواية اولاد حارتنا دي روايه غريبه جدا-

ليه يا دكتور هي بتتكلم على ايه-

الحقيقه ماعرفش بس زمايلي قروها و بيقولوا انهم كل ما بيقروها بيحسوا بحاجات بتتحرك حواليهم-

ليه يا دكتور هي مسكونه-؟؟-

يا ولاد الجن ده عالم غريب.. بعدين الروايه بتتكلم استغفر الله العظيم عن واحد عامل فيها اله-

.....................-

المهم خلينا في المحاضره...كنا بنقول ايه؟؟-

==================================

هذه محادثات حقيقيه للغايه حدثت جميعا معي بلا استثناء*

.. عدا اخر محادثه التي حكاها لي ابليس

بعد الانتهاء من كتابه البوست.. حكت لي اختي حكايه حدثت في مدرستها.. قررت ضمها الى هذه المحادثات.. ولو انها غير جامعيه**