جار القمر

دي مذكرات و كتبتها من ســنين/ في نوتة زرقا لون بحور الحنيـــن/ عترت فيها رميتها في المهمـــلات/ وقلت صحيح أما صحيح كلام مخبولين !!عجبي

الخميس، مايو ١٢، ٢٠٠٥

بالهنا و الشفا

ملاحظه 1 : هذه المدونه لا تناسب الاعمار اقل من 16 سنه
ملاحظه 2 : هذه المدونه ايضا كتبت في حاله تهييس عاليه جدا.. رجاء تطبيق القاعده العامه - ليس على المهيس حرج-
و دمتم
مساء الخير
فاكرين
هرم الحاجات اللي اتكلمت عنه في مدونه قبل كده؟؟؟
كانت قاعدته تتكون من حاجات اساسيه و قمته من حاجات انسانيه كماليه او أرقى شويه




ااااه بالمناسبه كان عندنا دكتور سيكولوجي بيقول في كتابه و باسلوب خبيــــــــــــث
ان من يحرم من المأكل و الملبس مثلا لا يستطيع ان يناضل من اجل الديموقراطيه او يهتم بها اساسا
المهم
نرجع لموضوعنا
قاعدة الهرم يا جماعه مكونه من حاجات اساسيه
basic needs
وهي المأكل و المشرب و الملبس و السكن و الجنس
او بالنص من المرجع
1. The physiological needs. These include the needs we have for oxygen, water, protein, salt, sugar, calcium, and other minerals and vitamins. They also include the need to maintain a pH balance (getting too acidic or base will kill you) and temperature (98.6 or near to it). Also, there’s the needs to be active, to rest, to sleep, to get rid of wastes (CO2, sweat, urine, and feces), to avoid pain, and to have sex. Quite a collection!
جاتلي فكره غريبه جدًا النهارده

اذا كان المأكل و الجنس في نفس مستوى الأهميه
ليه يا ترى ما كانش الأكل هو التابوو مش السكس
طيب نتمادى شويه.
بفرض ان الجنس لم يصبح تابوو
و ان الاكل هو اللي بقى تابوو

تفتكر ايه اللي كان حايتغير في المجتمع؟؟
و تفكير الناس؟
انا مش حاتكلم عن اباحه الجنس و جعله طبيعيا كالشرب و الاكسجين و حمضيه الجسم
عشان ما حدش يتهمني بالانحلال
حاتكلم عن اثر تحريم فعل الاكل
وجعله تابوو نفسي متيين
:دي بعض النقط اللي جت في بالي
-1
طبعا حيتكون عرف اجتماعي بان تناول الطعام امام الاخرين هو فعل وممارسه منافيه للاداب العامه و الشرائع السماويه
-2
ان تتم ممارسه الاكل تحت ظوابط شرعيه و اجتماعيه تقتضي التحقق من فاتوره شراء الاطعمه و مصدرها و موافقه صاحبها و شهود عيان على الشراء
-3
تغلق محلات السوبر ماركت و الاسواق و محلات الخضار و الفاكهة و العطاره و البقاله و يحاسب اشد المحاسبه من
يقوم ببيع هذه الاصناف مخالفًا للقانون
-4
تَصدُر تاويلات وفتاوى و كتب تتفذلك بان تحريم حريه الاكل هي في مصلحه المجتمع و تمنع التخمه و ما تؤدي له من امراض خطيره تسبب تاخر المجتمع كله و ضياعه
-5
تظهر في المقابل جماعات تعتبر منحله و خارجه عن العرف و الدين تمارس بكل حريه عاداتها الغذائيه المقززه بعيدا عن الشرع و القانون.. و تظهر جماعات اخرى تنادي بالحريه الغذائيه و حريه ممارسه الاكل و الشرب و لكن يتم اخراسهم عن طريق اعضاء المجتمع قبل سلطاته
-6
اكيد حايتم اعتبار الفم مكان مقدس يلزم تغطيته و عدم كشفه الا امام الاطعمه المرخص بها فقط
-7
يصبح اهم مكان في المنزل هو غرفه السفره والثلاجه هي اهم جهاز كهربائي
-8
تظهر اقوال تحث على تغطيه الراس ككل اتقاء للفتنه و منعا لظهور اجزاء حساسه كالفم او اللسان او لا قدر الله الاسنان
-9
: صوره خليعه


-10
تصدر فتاوى بان يتم تغطيه الاطعمه امام غير اصحابها بكيس نايلون اسود لا يشف و لا يصف ولا يبرز رائحه الطعام او لونه منعا للفتنه وان لا ينكشف غطائها الا على اخوه و اخوات و امهات و اعمام و عمات و ابناء و بنات صاحب الطعام
-11
فرض عقوبات قاسيه على كل من يتاجر بالاطعمه و المشروبات خارج الاطار القانوني
-12
تُفرض رقابه على اعلانات الماكولات حيث يمنع منعا باتا عرض لقطات تحمل مشاهد ممارسه غذائيه او ظهور شفتين او لسان في اي مشهد
-13
معاجين الاسنان و مطهرات الفم و كلوريتس و هولز كلها ادويه ممنوعه- جدول طبي
-14
يتم انشاء شرطه مكافحه التخمه وتعتبر امراض مثل التيفويد و الكوليرا و التهابات الامعاء دليل ادانه لاتصال غذائي بمنتجات مشبوهه
-15
ارتفاع اسعار الاطعمه و المشروبات و سوء حاله الشباب الاقتصاديه يحول دون حصولهم على اكثر من وجبه في اليوم
لذا يلجأ الشباب الى اتجاهات غير مقبوله تتمثل في اثاره الغدد اللعابيه و افرازات المعده بواسطه الرائحه او صور الطعام
-16
يزدهر تبادل شبابي واسع النطاق لصور ماكولات و مشروبات عاليه التكلفه و القيمه و ادوات غذائيه وكتب طبخ ممنوعه و تصبح تجاره الفورنو من اكبر صناعات الاقتصاد السري الغير مشروع
-17
تظهر قنوات طبخ مشفره و مجلات وكتب طبخ تباع سريا و تستورد من الخارج
-18
انتشار مجلات و جرائد صفراء تلاحق فضائح المشاهير الغذائيه اثناء اجازاتهم و في عملهم
-19
تظهر إهانات و شتائم اخرى تناسب الممنوع الجديد زي يابن المفجوع , يا بن التخينه, او يا بق امك
-20
اوصاف الماكولات و المشروبات زي محمر مشمر مقلي مسلوق مشوي ايضا الفاظ تخدش الحياء العام و تثير الغرائز-
-21
:هذه احدى الصور التي تثير الغرائز



-22
يرتفع سعرادويه القرحه و التلبك المعوي و غيرها... كما ترتفع اسعار البوتاجازات و الافران و االصواني و الاطباق و
ادوات الطبخ الخ الخ الخ و تنتشر السوق السوداء لهذه السلع
-23
تُستهجن الفاظ معينه مثل لذيذ, شهي, حريف ,مُشبِع باعتبارها كلمات خارجه عن الاداب
-24
انتشار جرائم الشرف الغذائي بسبب خيانه بعض المفجوعين و الطمع في وجبات من ائتمنوهم على بيوتهم و ثلاجاتهم و خيانه العيش و الملح
-25
تظهر قضايا تعدد الاكلات و استغلال المال و السلطه للحصول على اربع اكلات مشروعه او اكثر بينما الشباب الغلبان لا يجدون ثمن وجبه واحده يوميا
-26
يتم استيراد الماكولات الرخيصه من روسيا و دول البلقان و تركيا بطريقه غير مشروعه

واخيرا
قد تسبب صوره مثل هذه فضيحه سياسيه كبرى و طلبات بخلع هذا الرئيس و ابتزاز و شماته و و
تعبت
كفايه كده
فكر و حاتلاقي حاجات كتير كانت حاتبقى مختلفه
بس اكيد بعد كل ده برضه كنا حانلاقي فرصه لتحقيق حاجتنا الاوليه شرعيا
قصدي الاكل طبعا
و بالهنا و الشفا

9 Comments:

At ٥/١٣/٢٠٠٥ ٥:٥١ ص, Blogger wa7ed mn masr said...

................ هايل
عايز أقولك إنى مشغول مووت لكن لازم أقولك إن اللي بتكتبه عبقري ، و بإعتبار إني أكبر منك ببتاع 10 سنين كدة لازم أقولك برضه إنه لو فيه شوية عيال (لا مؤاخذة يعني )زيك كدةيبقى بجد فيه أمل كبير في بكرة
مشكلة: بأشوف تدوينة من بتوعك ، تعجبني ، أقول هاعلق عليها، أتلفت ، الاقيك كتبت واحدة جديدة،يابني بالراحة شوية مش ملاحقين وراك
keep your good work , it's really great , you make me optimistic...

 
At ٥/١٣/٢٠٠٥ ٦:٢٨ ص, Blogger 4thH said...

ههههههههه
طيب يا سيدي و لا تزعل عموما انا كده كده حاقلل كتابه عشان امتحاناتي.. بس في الاجازه حاول تفضي نفسك بقى ..

عامةً الف شكر يا صديقي على كلامك الجميل .. فعلا رفعت معنوياتي

تحياتي

 
At ٦/١٢/٢٠٠٥ ١:٣٩ م, Anonymous غير معرف said...

عفوا اريد ان أسجل رأياً،أطلت كثيرا في فرضية افترضتها أنت و من ثم بنيت عليها مباني عديدة بقاعدة فرضية . وحتى لا اطيل عليك , شكرا لك لأنك تمدني بمتعة الأمتزاج بالافكار

 
At ٦/١٢/٢٠٠٥ ٢:٢٩ م, Blogger 4thH said...

egyegy

شكرا... لكن الاراء مقامه على قاعده خياليه بحته...من حقى ان اتخيل ما سيحدث ان صحت هذه القاعده.. ومن حقك ايضا انت ترفض/ ترفضي تخيلي.. مظبوط..


ارجوك/ي انت ارى تخيلاتك عنما بعد تغيير التابوو..

تحياتي

 
At ٧/٠٤/٢٠٠٥ ٦:٣٠ م, Blogger moe said...

اية الحلاوة دي

 
At ٨/٣٠/٢٠٠٥ ٨:١٤ ص, Blogger Tara said...

انبهرت بهذا البوست
و لا اعرف لماذا لم اعلق عليه في وقتها
ع الاغلب كنت اقراه اوفلاين

يا ساتر على كمية الخيال اللي فيه

 
At ١١/١٦/٢٠٠٥ ٣:٠٣ م, Blogger SaudiEve said...

ما تنسى .. أهم شي حيتغير لو كان اللي بتتخيلو حقيقي هو ..
أن المجتمع العربي ما يرحم الشخص الي بيمارس "الأكل" خارج الإطار الشرعي و الإجتماعي المسموح به لو كان ----> ست (مرأة)!!.. بينما حيتغاضى و يبرر ممارسة التابوو و يتناساه عاطول لو كان الممارس راجل (ذكر)
in other words, we will have double standards as we usually do

الست الي بتاكل حبة ام اند امز صغيرة حيشنعو فيها سنين ... و الراجل الي بيمشي في الشوارع و بفمه بقرة أو خروف كامل بيدلدل منه ( hanging out of it ) حيقول المجتمع مسكين.. المغريات كثيرة و هو برضو راجل من لحم و دم

هههه ... مش هيك!

 
At ١١/١٦/٢٠٠٥ ٥:٠٥ م, Blogger 4thH said...

:-)))
هيك!!!

 
At ١١/٢٤/٢٠٠٥ ٢:٥٣ م, Anonymous غير معرف said...

الموقع جيد prince-2112@hotmail.com

 

إرسال تعليق

<< Home