..كفايه مظاهرات - سرد كروكي لأحداث الأمس

اليوم : الاربعاء 27/4

قررت الذهاب هذه المره

خرجت من الكليه الساعه 11

معي حازم و ريمون و عمرو

عمرو اخوان مسلمين

ريمون قبطي

و حازم ليبرالي

زي العبد لله

مشينا شارع كليه الطب لاخره

الدنيا زحمه بس ده الطبيعي في اسكندريه عز الظهر

مشينا تقريبا نص كيلو قبل مانوصل المنشيه

في السكه دخلت انا و عمرو في الخناقه بتاعت كل مره

العلمانيه و الدوله الدينيه

وقفنا الكلام لما وصلنا تخوم الميدان

حازم رمى الدستور و الغد في الشنطه

ريمون حط البالطو على كتفه

و عمرو شال المصحف من جيب قميصه

و حطه في جيب بنطلونه

مشينا

وصلنا الحقانيه

الاول عرفنا مكان المظاهره من تجمع ظباط و عساكر الامن المركزي

مش المتظاهرين

حرفيا كان عددهم اكتر من الماره في الشارع

متراصين على جانبي الرصيف

ممسكين في ايديهم حبال برتقالي

في طرفيها مساكات معدنيه

عمري ما شفتها في حياتي

قلت لحازم: اهي دي الثوره البرتقاليه

ضحكنا

و قدام المحكمه كانت هناك حديقه صغيره

يجلس فيها العشرات

رجال و شباب

على الكراسي و على النجيل الاخضر

اعتقدت ان هذه هي المظاهره..وتم منعها من دخول الشارع

هممت بالجلوس على احد مقاعد الحديقه

عندما سمعت صوتا هادرا يصيح بي

ممنوع يا كابتن-

ممنوع ليه-

رفع حاجبه و نظر لي باحتقار شديد

فهمت الفوله لوحدي و مشيت

ريمون اصابته شبه حاله هستيريه

صرخ

كل دول مخبرين...؟؟

ليه؟

بجد كان عددهم اكثر من الناس نفسها

تذكرت كلمه قريتها في الدستور..

10 عساكر لكل مواطن

ضحكت زي ما اكون اتعبطت

===============

عبرنا الشارع

وعند محل العصير شربنا خروب

و جلسنا قليلا على القهوه

لا يفصلنا عن الظباط و المباحث الا 10 متر

كنا في انتظار ان يظهر واحد من الحركه

واحد يهتف

واحد يرفع لافته

بس ما فيش

حازم اقترح انهم بيتجمعوا في حته الاول بعدين يتحركوا

عمرو امن على كلامه و اكد انهم بيعملوا كده في مظاهرات التيار الاسلامي

بعد 10 دقايق و صلت عربيه بوليس

نزل منها رتبه كبيره

فجأه لقيت القهوه كلها قامت

و طلعت تجري باتجاه الرجل

:في صوت واحد صرخ ثلاثتنا

.... يا ولاد ال

بيييييييب

المهم عرفنا ان المنشيه كلها اتبدلت بمخبرين

عمرو شاورلي فوق

قالي بص

بصيت

فوق سطوح كل عماره واحد او اتنين

معاهم الووكي توكي و الله اعلم ايه كمان

دي حرب بقى

قلت لنفسي

صدقني انا مش جبان

و لا اصحابي

بس انا اتصورت نفسي وانا بين ايد الناس دي

خصوصا مع نظره الذكاء اللي بتشع من عين كل واحد فيهم

و هو بيطبق التعليمات ضد اعداء الوطن

و جت في دماغي صوره احمد زكي في البريء

قررنا نمشي

و الظاهر ده كان قرار بقية اعضاء الحركه

و المنظمين ليها

لأني ما شفتش منهم بني آدم واحد

ممكن لو كان في واحد هناك

مجرد واحد بس

كنا ثبتنا

بس كله مخبرين و ظباط و عساكر الامن المركزي

اللي شكلهم مش عارفين اساسا هم بيعملوا ايه

و احنا في طريق الهروب من ساحه القتال.. قصدي المنشيه

عيني جت في عين ظابط لابس مدني

اكيد مباحث ..حازم قاللي

الراجل شاف البالطو على اكتافنا اتجن

ايوه يا دكاتره-

ايوه-

ممنوع الوقوف هنا-

احنا ماشين مش واقفين-

قلت وحازم يزغدني في جنبي

طب اتفضل منك له اللي مستنيينهم مش حاييجوا-

ضحكت ضحكه صفره

و مخي وقف لحظه

و كل اللي قدرت اقوله

أوكي-

و تقريبا طلعت أجري

شكرا يا حضره الظابط و صلتني الرساله

فهمت ان لو واحد فينا وقع في ايديكوا

وخصوصا شهر الامتحانات ده

حاتخلوه يقول كفايه صحيح

بس كفايه مظاهرات

مش حاجه تانيه

واحنا في السكه حازم و ريمون جاتلهم حاله جنونيه

كل ما يشوفوا حد يقولوا ده مخبر

رجل بيركب ميكروباص

ست حامل

واحد مع صحابه

بنت شايله شنطه و لابسه بدله

كل الناس كانت عينيها فيها نظره ظابط المباحث

و كل البلد كانت حكومه

================

في السكه قلت بصوت عالي جوه الميكروباص

ووسط الناس

احنا حانخاف و لا ايه؟؟ امال سياسه ايه و قرف ايه؟-

بس نخلص امنحانات و انشاء الله نروح على طول في اي واحده جديده

امنوا على كلامي بهز الراس

ان شاء الله-

ان شاء الله-